መምህሬ

እንኳን አደረሰህ ውዱ የእውቀት አባት፣
እንኳን አደረሰሽ ውዷ የእውቀት እናት።

እንደ እናት እንጀራ ፤ እውቀት የመገብከኝ፣
ሌት ቀን ተዘጋጅተህ ምክር የለገስከኝ፣
የኔ የእውቀት አባት እድሜህ ይርዘምልኝ።

ስጋ እና ደም ይዤ ሰው ሁኘ ብፈጠር፣
በምክር በተግሳፅ እውቀት ባትሰጠኝ፣
በዚህ በክፉ ቀን በውስብስብ አለም ምን ይበቃኝ ነበር።

ቃላት በማስቆጠር ላንቃህ የደረቀው፣
በሒሳቡ ስሌት ራስህ የታመመው፣
በጠመኔው ቡላይ አይንህ የፈዘዘው፣
እውቀት ያካፈልከኝ ሰው ቢሆን ብለህ ነው።

ራዕይህ ረጅም ነው ካድማስ ወዳማዶ፣
እውቀት እንድስፋፋ ትውልዱ ተዋልዶ፣
አለማወቅ ጠፍቶ ሰው እንዲማር ወዶ፣
ስላስተማርከው ነው የሄደው ተራምዶ።

የሙያዎች እናት የሁሉ መፍለቂያ፣
መምህርነት ነው ወሳኝ ለኢትዮጵያ።

የሰው ልጅ ሰልጥኖ ቢሄድ ወደ ጠፈር፣
ሌላ ፕላኔት ላይ ቢሄድ መንኮራኩር፣
ድፍን አውሮፓ ላይ ቢሰራ ታአምር፣
አዲስ ግኝት ቢኖር ቢደረግ ምርምር፣
መምህር ብቻ ነው የዚህ ሁሉ ሚስጢር።

እናም መምህሬ ደግሜ ምነግርህ፣
ምሳሌ ነህና በእውቀት በምግባርህ።

ጉዞህ ረጅም ሆኖ ቢበዛ አሜኬላ፣
ላገር ህልውና የለም ካንተ ሌላ።

ልብህ ይሙላ ተስፋ የልማት ሰራዊት፣
ችቦህን ለኩሰህ ተራመድ ወደ ፊት፣

ተፃፈ መስከረም 25/2017

         በ/ያሲን እንድሪስ/

Abdi Boru secondary school
———–///////————-